Markaðsmál eiga það til að hafa á sér þá ímynd að markaðsfólk læri einfaldlega að troða upp á mann allskonar hlutum sem maður þarf ekki. Það er hinsvegar mikill misskilningur. Markaðsstarf snýst um að mæta þörfum fólks, og svo þarf maður að láta fólk vita að maður getur mætt þörfum þess, leyst vandamál þess o.s.frv. Það gerir ekkert gagn að geta gert gagn en gera það svo ekki vegna þess að enginn veit af því, eða fólk áttar sig ekki á því hvað maður gerir fyrir það ;)
Og hvað kostar þetta svo? – verðlagning er oftast hausverkur
Du du duuuuuuuuuuuu…. (lesist með tilþrifum :)
UPPFÆRSLA!
Hér getið þið heyrt akkúrat hvernig þetta “du du duuuuuuu” á að hljóma!: http://youtu.be/UBd7dloQI6E
– takk Sandra Karls fyrir að senda mér ;)
Þessi hræðilega spurning sem við óttumst öll. Þegar fólk spyr okkur hvað hlutirnir kosta. “S**t, er þetta allt of dýrt hjá mér?”, og svo þegar þú segir þeim það og þau kaupa strax “oh, hefði ég kannski getað fengið meira fyrir þetta?”
Verðlagning er almennt ekkert einfalt mál. Jú, stundum er þetta bara spurning um að kanna hvað gengur og gerist með sambærilega vöru eða þjónustu á markaðnum og ákveða svo hvar maður ætlar að staðsetja sig gagnvart þeim. Ætlar maður að vera aðeins ódýrari og ná þannig inn viðskiptavinunum, eða ætlar maður að vera aðeins dýrari og gefa þar með til kynna að maður bjóði betri gæði?
Er fjármálastjórinn að bulla?
Eitt er alveg á hreinu. Verðlagning kemur fjármáladeildinni barasta ekkert við. Hún er algjörlega 110% markaðsmál og ef einhver reynir að segja þér eitthvað annað, þá er sá hinn sami bara að bulla. Jú, að sjálfsögðu viljum við að við fáum fyrir vöruna okkar eða þjónustu nóg til að dekka kostnaðinn sem fylgir því að veita eða framleiða hana. Staðreyndin er hinsvegar sú að fólk borgar einfaldlega það sem það er tilbúið að borga og er alveg sama hvað það kostar þig. Ef þeim finnst hlutirnir of dýrir og ekki þess virði að borga uppsett verð fyrir þá, þá einfaldlega kaupa þau ekki. (Það áhugaverða er að ef þeim finnst þeir of ódýrir þá treysta þeir þeim ekki og kaupa heldur ekki!) Þitt verkefni liggur þá ljóst fyrir. Annað hvort verðurðu að hækka virðið í augum fólks, eða ná niður kostnaðinum þannig að þú getir boðið betra verð.
Þetta eru enn ein rökin fyrir mikilvægi þess að byggja upp sterkt brand. Sterkt brand hefur meira virði í augum fólks en bara varan eða þjónustan án þess. Sjáðu bara Apple ;)
Eiginleikar og virði (e. features and benefits)
Málið er líka að fólk er ekki að borga fyrir eiginleika vörunnar eða þjónustunnar (e. features) – fólk borgar fyrir það sem því finnst varan eða þjónustan gera fyrir sig (e. benefits). Þess vegna er mjög mikilvægt að átta sig almennilega á því hvað fólki finnst hún gera fyrir sig – og það er ekkert alltaf það sem maður heldur. Til dæmis skipta tilfinningar mun meira máli en margur heldur, og í raun öllu máli því við kaupum byggt á tilfinningu en ekki rökhugsun.
Tökum sem dæmi þá þjónustu sem ég veiti með MáM Bootcamp. Ég get talið upp hvað fólk fær inni í námskeiðinu (og geri á vefsíðunni). Hversu margar mínútur af vídeó, hversu mikið af texta, vinnuskjölum, hversu mikið af “live” tímum með mér, ótakmarkaðar spurningar gegnum vefinn, lokaða Facebook grúppu þar sem ég svara spurningum og fólk styður hvert annað, auk þess að fá endurgjöf á markaðsprógrammið þitt og einkatíma og með því og öllu hinu sérsniðna markaðsráðgjöf og hjálp með markaðsstarfið þitt. En hverju skiptir það? Jú jú, fólk vill fá að vita þetta, en það er er ekki það sem skiptir þau máli. Það sem skiptir máli er það sem þetta gerir fyrir viðkomandi.
Þetta þýðir að markaðsstarfið verður markvissara, tekur þar með minni tíma og peninga en nær á sama tíma meiri árangri, sem skilar sér í betri rekstri, meiri tekjum fyrir minni kostnað og þar með meiri hagnaði. Þetta þýðir líka að markaðsstarfið verður ekki svona mikill hausverkur, því þú veist hvað þú átt að vera að gera, hvenær og hvernig. Öll aðstoðin sem fylgir – ótakmarkaðar spurningar og sérstaklega ævilangur aðgangur að lokaðri Facebook grúppu (ja, a.m.k. þar til ég fer á ellilífeyri ;) þýðir að maður er ekki einn að vasast í þessu lengur – maður hefur alltaf aðila sem maður getur leitað til og hefur vit á málunum oooog stuðning frá öðrum sem eru að glíma við álíka hluti og maður sjálfur. Þetta er meðal þess sem þjálfunin gerir fyrir mann. Það er það sem maður borgar fyrir.
Hvað viltu?
Hvað manni finnst um töluna á verðmiðanum litast af svo mörgu. Í þessu tilfelli litast það m.a. af því hvernig maður er staddur í markaðsmálunum eins og er. Hversu mikið maður þarf á ofangreindu að halda. Úr hversu miklu maður hefur að moða. Og síðast en ekki síst, hvað maður vill. Ef maður t.d. vill öflugt markaðsstarf sem gerir manni kleift að byggja upp fyrirtæki í góðum rekstri (það er ekki þar með sagt að maður vilji endilega byggja upp stórfyrirtæki, en fyrirtæki sem gengur vel og þarf ekki alltaf að vera í harki), þá setur maður ekki fyrir sig að borga fyrir þetta því maður gerir sér grein fyrir því að á endanum sparar þetta manni tíma og peninga og maður nær árangri fyrr. Þetta er þess virði.
Þegar ég byrjaði í eigin rekstri, þá nýtti ég mér aðallega frítt efni á netinu. Það er fullt gott þarna úti, og ég hafði góðan grunn í viðskipta- og markaðsfræði þannig að ég taldi mig geta vitað hvað af því var gott og hvað ekki. Það var hinsvegar ekki fyrr en ég hætti að eyða tíma í að tína til frítt dót sem risti grunnt (eðlilega), og fór að fjárfesta í fyrirtækinu mínu, sem ég virkilega fór að finna mun. Í dag tek ég reglulega námskeið sem gagnast fyrirtækinu mínu, því að ég veit að þá þarf ég ekki að leita út um allt að hlutunum, og get fengið gæða efni, akkúrat það sem ég þarf, beint í æð frá þeim bestu í bransanum. Mér reiknast t.d. til að bara í sumar hafi ég eytt um kvartmilljón í námskeið og bækur til að efla mitt eigið markaðsstarf og fyrirtæki – sem þýðir líka að ég er enn betur í stakk búin að bæta markaðsstarf viðskiptavina minna. En ég veit líka að þessi fjárfesting er miklu meira en þess virði, því að ég er að læra hluti sem skila mér mun betra markaðsstarfi og mun betri rekstri – og sem bónus, bæta líka þjónustuna við viðskiptavini mína.
Gefðu þeim samanburð
Ef það er ekki nóg að sýna fólki fram á hvað varan þín eða þjónusta gerir fyrir það, þá er líka oft gott að sýna þeim fram á hvað annað þau geta fengið fyrir peninginn.
T.d. ef að maður ætlar að eyða álíka pening og MáM Bootcamp kostar í það að efla markaðsstarfið með öðrum leiðum, þá væri hægt að setja þetta upp svona:
Fyrir sama pening getur þú:
- Keypt 10-15 tíma hjá auglýsingastofu eða markaðsráðgjafa (sem dugar skammt) og eftir að þeir eru búnir þá þarft þú væntanlega að kaupa fleiri tíma hjá þeim þar sem þú ert ekki búinn að byggja þekkinguna upp hjá þér og þarft því áfram á þeim að halda (ekki að það sé slæmt að skipta við auglýsingastofur og markaðsráðgjafa, alls ekki! Ég bara mæli með því að vera ekki háð þeim og geta heldur kippt þeim inn eftir þörfum á þínum eigin forsendum). Þá er kannski alveg eins gott að ráða einhvern í markaðsmálin, en hey, þú gerðir það einmitt ekki þar sem þú ert ekki farin að geta borið þann kostnað. Oh well…
- Keypt auglýsingakubb á baksíðu einhvers dagblaðsins en átt þá eftir að borga fyrir að láta hanna auglýsinguna. Heilsíða kostar þig eins og 2-3 Bootcamp námskeið.
- Kannski mögulega látið setja upp vefsíðu – ef þú færð megadíl og hún er mjög einföld.
- Þú gætir keypt ca. 4-5 birtingar á skjáauglýsingum í kringum fréttir, en átt þá eftir að láta gera hana.
- Keypt hefðbundið námskeið í markaðsmálum, sem oft er ekki auðvelt að sníða nákvæmlega að þínum þörfum, og þar sem þú mætir á ákveðnum tímum á ákveðinn stað og getur bara spurt kennarann í þeim tímum. Þú fengir líklegast ekki úr því heildstætt markaðsplan, né gætir þú fengið einkatíma í ráðgjöf á meðan á því stæði né í framhaldinu. Já og þegar það er búið, þá er það búið. Punktur og basta.
Stundum virkar að setja hlutina svona upp fyrir fólk.
Sama hvernig maður lítur á það þá er það viðskiptavinurinn sem ræður og honum þarf að finnast það þess virði að kaupa vöruna þína eða þjónustuna. Þitt verkefni er þess vegna að bjóða vöru eða þjónustu sem fólk vill og setja hlutina þannig fram að þeim finnist það peninganna virði.
Hvað gerir varan þín eða þjónusta fyrir viðskiptavininn og hvers virði er það fyrir hann? Það er lykillinn að rétta verðinu ;)
5 leiðir til að spara meiri tíma í markaðssetningu
Þessi blessaður tími! – okkur vantar alltaf meira af honum!
“Time is on my side” sungu Rolling Stones. Svei mér þá, ég held þeir séu þeir einu sem það á við um! Alveg sama við hvern maður talar, hvert maður snýr sér og hvað maður gerir, það hefur enginn tíma.
Í sumar hef ég gert tvær kannanir meðal fólks í fyrirtækjarekstri og rauði þráðurinn, gegnumgangandi er að fólk vantar tíma. Það hefur ekki tíma í markaðsstarfið, það hefur ekki tíma til að læra að gera markaðsstarfið hagkvæmara þannig að það nái meiri árangri með það á minni tíma. Það hefur ekki tíma til að vera til!
Úff, ég skil það svo vel. Ég þekki þetta algjörlega sjálf!
En veistu, þetta þarf ekki að vera svona. Ég veit það líka af eigin raun, bæði frá mér og viðskiptavinum mínum.
Þú þarft engan fyrirlestur um um nauðsyn markaðsstarfsins og hversu mikilvægt það er að eyða tíma í það því annars gerist lítið sem ekkert í fyrirtækinu þínu og þú heldur áfram eins og hamstur í hjóli. Ég meina – hey, þú veist það nú þegar, ekki satt ;) Ef ekki, þá ættirðu kannski að kíkja hér.
Núna ætla ég að tala um tímann sem þú græðir á því að eyða fyrst smá tíma í að koma markaðsstarfinu í öflugan farveg. Þeim tíma sem þú verð í markaðsstarfið í dag, ef einhver er, gæti mögulega verið betur varið þannig að þú fáir mun meira út úr því sem þú gerir ;) Æi þú veist, þetta með að taka sér tíma til að gera teikningar af húsinu áður en maður byggir svo að það endi ekki svona:
heldur svona:
Ólíkt betra, ekki satt?
Kíktu á þetta litla vídeó til að sjá hvað eru mikilvægustu atriðin til að spara tíma í markaðsstarfinu en ná samt sem áður mun betri árangri en ella:
Ég er einmitt líka um þessar mundir að vinna í því að losa um enn meiri tíma svo ég geti sinnt því sem er mikilvægt, en ekki bara að slökka elda sem eru áríðandi. Ég ætla að segja þér meira frá því síðar…
xo
Þóranna
Hinir mörgu hattar fyrirtækjaeigandans!
Gengur dæmið upp?
Strategía og taktík
Frábær sumarlestur eða hlustun!
Það er komið sumar og eins og við vitum róast allt á klakanum á þessum árstíma. Ég ætla þess vegna að taka mér gott (og að ég tel verðskuldað ;) hlé frá bloggskrifum og tölvupóstsendingum fram í ágúst. Hinsvegar ætla ég ekki að skilja þig eftir í lausu lofti ef þig skyldi þyrsta í meiri markaðsþekkingu svo ég tók saman lista yfir nokkur af uppáhalds markaðsbloggunum mínum og hlaðvörpum (e. podcast). Ég sjálf eeeeeeeeeeeeeeeeeeeeeeeeelska hlaðvörp. Það er svo yndislega þægilegt að geta lært og fengið markaðsfræðin beint í æð á meðan ég er að gera eitthvað annað eins og að keyra Reykjanesbrautina, fara í labbitúr, vinna í garðinum eða bara hvað sem er annað þar sem eyrun og heilabúið er laust þó að kroppurinn sé að vinna ;) En það er líka voða notalegt að liggja í sólinni úti á palli eða á ströndinni og lesa – ja eða kúra uppi í sófa í rigningunni með spjaldtölvuna ;)
Ég er áskrifandi að hátt í 200 bloggum, ótöldum póstlistum og hátt í 20 hlaðvörpum, en það eru bara örfá sem ég passa að missa ekki af, sem fá að fara inn í innboxið hjá mér og ég tjékka á reglulega.
Það eru fá sem fjalla um markaðsstefnumótun, og þau sem gera það eru almennt ekki mjög aðgengileg nema fyrir sérfræðinga. Ég hef þess vegna ekki sett nein þeirra hérna inn, nema kannski SocialTriggers sem kemur mögulega stundum inn á slíka hluti. Hinsvegar hef ég sett inn efni sem gerir mér kleift að fylgjast með þróuninni í hinum hraða og síbreytilega heimi markaðssetningar á netinu, ekki síst samfélagsmiðla og efnismarkaðssetningar.
Hér er listi yfir topp 11 staðina þar sem ég sanka að mér markaðsþekkingu dags daglega:
Derek Halpern með Social Triggers er snillingur í markaðssetningu og fjallar mestmegnis um sálfræðina á bak við markaðssetningu á netinu. Hlaðvarpið hans er alltaf það fyrsta sem ég hlusta á áður en ég tjékka á nokkrum öðrum þar sem hann er alltaf með frábæra gesti úr fræðaheiminum og viðskiptalífinu.
Neil Patel með Quicksprout bloggið er snilli í öllu sem viðkemur markaðssetningu á netinu og það kemur ekki einn einasti blogg póstur frá honum sem er ekki stútfullur af gagnlegum upplýsingum. Ef eitthvað er þá fær maður of mikið af upplýsingum – en maður getur alltaf treyst því að þær séu pottþéttar.
Amy Porterfield er Facebook gúrúinn minn svo ég fylgist vel með henni í tengslum við þau mál. Hún er bæði með blogg og hlaðvarp og fær oft til sín góða gesti. Í gegnum tíðina hefur maður skráð sig á ótal frí vefnámskeið hjá hinum og þessum og oft séð eftir tímanum – en það hefur aldrei gerst með Amy. Hún klikkar ekki ;)
HubSpot er óþrjótandi hafsjór af fróðleik og þekkingu í kringum “inbound marketing”, þ.e. markaðssetningu sem dregur að – sem er akkúrat sú markaðssetning sem ég vil stunda og hvet mína viðskiptavini til að stunda. Bloggið er flott og safnið þeirra af ýmsum fróðleik og gögnum varðandi markaðssetningu ekki síðra.
Digiday er vefmiðill helgaður vefmiðlun, markaðssetningu og auglýsingum og þar eru oft alveg hrikalega flottar greinar. Vel þennan miðil fram yfir marga aðra vel þekkta á markaðnum.
SocialMouths er bloggið hjá Francisco Rosales, blöndu af Ítala og Guatemalabúa sem býr í LA. Hann fjallar um blogg, samfélagsmiðla, efnismarkaðssetningu, markaðssetningu í gegnum tölvupóstlistann og “conversion” – þ.e. að ná viðskiptunum. Það er alltaf djúsí “stuff” í því sem hann sendir frá sér.
KISSmetrics er greiningartól fyrir netmarkaðssetningu og þeir halda út mjög góðu bloggi um greiningar, markaðsmál og prófanir. Oft mjög góðar greinar þarna og gagnlegar.
Social Media Examiner er mjög þekkt samfélagsmiðlablogg og þarna er hafsjór af upplýsingum og efni. Þú verður ekki svikinn. Þeir eru líka með hlaðvarp.
Fyrir þá sem vilja kafa meira í efnismarkaðssetningu:
Buffer bloggið er frá Buffer appinu sem er samfélagsmiðlastjórnborð. Þeir blogga um samfélagsmiðla og tengt efni og þarna eru oft mjög góðir póstar.
Copyblogger eru gamlir refir í efnismarkaðssetningu og þarna er gríðarlegur hafsjór af fróðleik varðandi hana og tengd efni s.s. textaskrif, samfélagsmiðla, leitarvélabestun, markaðssetningu með tölvupóstlistanum og markaðssetningu á netinu almennt.
Content Marketing Institute fjallar, eins og nafnið gefur til kynna, um efnismarkaðssetningu og tengt efni. Þarna finnurðu mjög gott efni um það.
Njóttu vel og þú mátt endilega segja mér hvernig þú fílar þetta ;) – já og ef þú lumar á einhverjum uppáhalds sem þú vilt deila með fólki, endilega gerðu það! :)
- « Previous Page
- 1
- …
- 4
- 5
- 6
- 7
- 8
- …
- 26
- Next Page »