vitund Archives - Thoranna.is

Endurtaka, endurtaka, endurtaka…

Í fyrri pósti hef ég talað um að maður þurfi að finna hvern einasta snertipunkt við brandið og skoða hvernig við getum notað hvern og einn til að byggja það. Við þurfum að tryggja að fólk fái sömu upplifun af okkur hvar sem það kemst í snertingu við okkur. En það er ekki nóg. Þú verður líka að endurtaka, endurtaka, endurtaka, endurtaka og endurtaka enn og aftur…

Það er frábært þegar manni leiðist!

Endurtekning er lykilatriði í markaðsetningu, og ég get lofað þér því að ef þú ert að vinna markaðsstarfið rétt, þá kemur þér til með að leiðast. Þú verður leið(ur) á brand útlitinu; litunum þínum, leturgerðinni, myndunum o.s.frv., þú verður leið(ur) á markaðsefninu; auglýsingunum, skilaboðunum o.s.frv. Þú færð leið á þessu öllu saman. Það er alveg klárt mál! En málið er að þú ert alltaf að vinna með þetta. Þú ert alltaf að horfa á þetta, hugsa um þetta, þú ert alltaf að hrærast í þessu. Það væri hinsvegar fínn árangur ef fólkið sem þú ert að reyna að ná til sæi svona 1% af öllu því sem þú ert að gera. Þú verður að muna að markaðsstarfið snýst ekki um þig. Það snýst um þau. Þér á eftir að leiðast þetta, en þú verður bara að láta þig hafa það og harka af þér!

Ef þú ferð að breyta hlutunum bara af því að þér leiðist; breyta skilaboðunum, breyta útlitinu hvort sem það er á auglýsingum, bæklingum, efni á samfélagsmiðlunum, blogginu eða hverju sem er,
þá ertu aftur á byrjunarreit. Við vitum öll hversu margir hlutir berjast um athygli okkar hvern einasta dag. Ef þú ert alltaf að breyta þá þekkir fólk þig ekki aftur og þú þarft að byrja að byggja upp vitund og fá þau til að þekkja þig algjörlega upp á nýtt. Ef þú hinsvegar heldur þig við það sama þá styrkirðu þig í minninu á þeim og endar með því að festast þar.

Slönguspilið

Þetta er svolítið eins og slönguspil. Með því að vera alltaf að og hafa samræmi í því sem þú gerir þá færistu upp borðið. Af og til gerist eitthvað stórt og flott, þú kannski færð góða fjölmiðlaumfjöllun eða herferð heppnast sérstaklega vel og þú færð að fara upp stigann og komast hraðar áfram. En ef þú ferð að breyta hlutunum, breyta skilaboðunum, útlitinu o.s.frv. þá nær snákurinn í þig og þú rennur niður aftur og þarft að byrja að klífa upp á nýtt!

Endurtekning > Þekking > Traust

Annar mikilvægur hlutur þegar kemur að endurtekningu, fyrir utan bara að tryggja að fólk viti af manni og þekki mann, er traust. Fólk kaupir af fólki og fyrirtækjum sem það þekkir, líkar við og treystir. Og endurtekning byggir traust. Spáðu bara í þessu þegar kemur að fólki. Við þekkjum öll einhverja sem okkur líður ekki alveg nógu vel með bara vegna þess að “ég veit aldrei hvar ég hef hann”. Ef við erum ekki samkvæm sjálfum okkur og fólk veit ekki alveg við hverju það á að búast þá fer það að hugsa “hmmm… ég veit nú ekki alveg með þetta”. Það kemur til með að eyðileggja það traust sem þú kannt að hafa byggt upp.

Það hefur einnig verið sannað að bara við það að sjá eða heyra sama hlutinn aftur og aftur og aftur þá aukast líkurnar á að þér fari að líka við hann og treysta honum. Hver man ekki eftir einhverju óþolandi popplagi í útvarpinu sem maður þoldi ekki þegar maður heyrði það fyrst en maður er farinn að dilla sér við þegar maður er búinn að heyra það í þúsundasta skiptið eða svo? ;)

Hér er saga sem sýnir þetta enn betur: Segjum svo að þú farir í ræktina í hverri viku, alltaf á sama tíma, og þar er einhver sem er alltaf þar á sama tíma og þú. Þú þekkir þessa manneskju ekki neitt, talar aldrei við hana, veist ekkert hvað hún heitir, en hún er alltaf þarna. Þú ert alltaf að sjá þetta andlit. Svo ferðu á t.d. námskeið þar sem þú þekkir ekki nokkurn mann, nema að þessi aðili úr ræktinni er þarna. Þegar leiðbeinandinn segir fólki að vinna í pörum, hver er fyrsta manneskjan sem þú dregst að? Að öllum líkindum er það manneskjan sem þú ert margoft búin(n) að sjá í ræktinni, því að það að hafa séð hana aftur og aftur og aftur hefur byggt upp traust og þér finnst þú þekkja hana – a.m.k. betur en hina. Þetta virkar algjörlega eins með fyrirtæki, vörur og þjónustu. Þú þarft að sjá þau aftur og aftur og aftur. Því meira sem þú sérð þau, því betur ferðu að þekkja þau og því meira treystirðu þeim. Það er enn ein ástæðan til þess að vera ekki að breyta hlutunum alltaf hreint. Þú verður að vera samkvæmur sjálfum þér og endurtaka, endurtaka, endurtaka, endurtaka, endurtaka og endurtaka svo enn meira.

Endurtekur þú þig nógu mikið?

Markaðsferlið

Það er mikilvægt að skilja ferlið sem viðskiptavinurinn þarf að fara í gegnum áður en hann er tilbúinn að kaupa af þér. Ef þú skilur það ferli, þá ertu betur í stakk búinn til að nýta markaðsaðgerðirnar þínar og skilaboðin markvisst til að færa hann í gegnum það og að kaupum.

Fyrsta skrefið er einfaldlega að fólk viti að þú ert til – vitund. Það þýðir ekki bara að fólk hafi séð þig einu sinni eða tvisvar, það þarf að hafa virklega tekið eftir þér til að hægt sé að segja að vitund sé til staðar. Það er ansi erfitt að fá einhver til að kaupa af manni sem veit ekki einu sinni að maður er til, ekki satt? ;)

Þó svo að fólk viti að þú ert til, þá er ekki þar með sagt að það hafi áhuga. Og ef fólk hefur ekki áhuga á fyrirtækinu þínu, vörunni eða þjónustunni, þá nær þetta ekki lengra. Þú verður að vekja áhuga þeirra til að fá þau til að vera tilbúin að hlusta og taka til greina það sem þú ert að segja. Það er ekki fyrr
en áhuginn er til staðar að þau tjékka á þér, með því t.d. að koma á vefsíðuna þína eða kíkja á þig á samfélagsmiðlunum, eða með því að kíkja við í versluninni þinni næst þegar þau eiga leið hjá.

Hvað svo ef þeim líkar ekki það sem þau sjá og upplifa þegar þau tjékka á þér? Þá er þetta líka bara búið. Við kaupum ekki frá fólki eða fyrirtækjum sem okkur líkar ekki við. Það er bara svo einfalt. En alveg eins og með fólk, þá mun aldrei öllum líka við þig – og það er allt í lagi. Hey, það er fullt af fólki þarna úti sem þolir mig ekki. En það skiptir engu máli, því að það kemur til með að vera fólk þarna úti sem fílar mig. Það að vera annað hvort eða er frábært, þú vilt að fólk annað hvort elski þig eða hati þig – því að þeir sem elska þig eru þeir sem eru líklegir til að kaupa. Þeir sem hugsa bara “æi, þetta er ágætt” gætu kannski keypt af þér einhvern tímann, en þeir eru alveg eins líklegir til að kaupa af einhverjum öðrum. Þú vilt ekki að fólk noti “ugla sat á kvisti” til að velja hvort það verslar við þig eða einhvern annan og hvað þá að það fari að horfa bara í verðin – það er stórhættulegt fyrir viðskiptin.

Hefurðu einhvern tímann farið inn í verslun og ætlað að kaupa eitthvað, en skipt um skoðun þegar þú ert kominn inn? Þú ætlar ennþá að kaupa það sem þú komst til að kaupa, en þú ætlar bara ekki að kaupa það þarna. Hefurðu jafnvel keyrt bæinn þveran og endilangan til að fara og kaupa hlutinn einhvers staðar annars staðar og jafnvel borgað aðeins meira, bara vegna þess að þér líkaði sú verslun betur? Við skiptum við fólk og fyrirtæki sem okkur líkar við, svo það skiptir máli að markhópnum þínum líki við þig!

Annar mikilvægur þáttur er traust. Við þurfum að treysta fólkinu og fyrirtækjunum sem við eigum viðskipti við. Traust skiptir alltaf máli, en það hefur kannski ekki alveg jafn mikið vægi þegar við kaupum eitthvað ódýrt sem skiptir okkur litlu máli, en eftir því sem hlutirnir verða dýrari, persónulegri eða krefjast meiri skuldbindingar, þá kallar það á meira traust til að við séum tilbúin að kaupa. Þú verður þess vegna að finna markvissar aðferðir til að byggja upp traust.

Hversu mikinn áhuga sem við höfum, hversu mikið sem okkur líkar við hlutina og við treystum þeim, þá finnst okkur alltaf öruggara að fá að prófa. Prufa er því oft algjörlega nauðsynleg áður en fólk er tilbúið að kaupa. Þegar um vöru er að ræða er þetta oft einfalt mál. Þú getur farið í verslunina og skoðað vöruna, haldið á henni, jafnvel prófað hana. Það eru oft ábyrgðir og oft hægt að skila innan ákveðins tíma. Þegar um þjónustu ræðir getur þetta verið aðeins erfiðara. Það er jú eðli þjónustu að ef þú prófar hana þá ertu búinn að fá hana. Það er ekki hægt að klippa hárið aftur á, eða tæma hausinn af þeirri þekkingu sem fólk fékk á námskeiðinu. Þú þarft þess vegna að hugsa aðeins út fyrir kassann með þetta og það eru margar leiðir til að leysa þetta mál. Sumar þjónustur bjóða prufu í ákveðinn tíma (mjög þekkt í hugbúnaðarbransanum t.d.), þú getur notað myndbönd, ummæli viðskiptavina og ýmsar aðrar leiðir.

Það er ekki fyrr en fólk hefur farið í gegnum alla þessa þætti: vitund – áhuga – líka við – traust – prufu – þá fyrst komum við að sölu. Og oftast þarf að ýta aðeins við henni. Fólk er einfaldlega þannig að því finnst auðveldara að taka ekki ákvörðun heldur en að gera það, svo þú þarft að ýta við þeim að taka ákvörðunin um að kaupa – og tryggja að það sé ekkert í söluferlinu sem hægt er að hnjóta um.

Þessu lýkur ekki öllu með sölunni. Það mætti segja að þarna sé sambandið fyrst að byrja, því eðli sambandsins hefur breyst. Þetta er ekki lengur bara einhver manneskja út í bæ, þessi manneskja er núna viðskiptavinur. Þú hefur þegar leitt viðkomandi í gegnum fyrri hluta markaðsferlisins, þannig að það er bara rökrétt að halda áfram að byggja þetta samband. Þessi aðili þekkir þig, hefur áhuga á þér, líkar við þig, treystir þér og hefur prófað vöruna þína eða þjónustu. Jú, að sjálfsögðu viltu alltaf líka vera að vinna í að ná í nýja viðskiptavini til að fyrirtæki vaxi enn frekar, en ekki sleppa hendinni af þeim sem þú hefur náð til nú þegar. Finndu út hvað meira þú getur gert fyrir þá og þá nærðu ekki bara endurtekinni sölu, heldur geturðu líka fengið eitt af öflugustu markaðstólunum – tilvísanir! Þegar viðskiptavinirnir þínir mæla með þér við aðra þá vita þeir af þér og eru mun líklegri til að hafa áhuga á þér, líka við þig, treysta þér og vera tilbúin til að prófa þig heldur en aðrir. Tilvísanir geta verið ótrúlega öflugar og eru markaðstól sem þú átt klárlega að vera að byggja upp.

Spekúleraðu í því hvað þú ert að gera í markaðsstarfinu í dag og hvernig það leiðir mögulega viðskiptavini í gegnum markaðsferlið. Hvernig geturðu notað aðgerðirnar til að styðja við ferlið og leiða fólk í gegnum það að sölu, endurtekinni sölu og tilvísunum?

Leiddu mig

Fyrir þá sem hafa fylgt mér í einhvern tíma er markaðsferlið ekkert nýtt. Ef þú ert ný(r), kíktu þá hér snöggvast ;) Og fyrir þá sem lásu póstinn í síðustu viku, þá talaði ég um að eiga markaðsstarfið frekar en að leigja það, með því að nota auglýsingar og ýmislegt fleira til að ná fólki inn í ferli þar sem þú þarft síðan ekki að borga fyrir hvert einasta skipti sem þú vilt að fólk sjái þig eða komist í samband við þig.

Ég ætla að fjalla aðeins meira um það hvernig við getum gert þetta, þ.e. að eiga markaðsstarfið okkar, með því sem á engilsaxneskunni er kallað Lead Management en lead er mögulegur viðskipavinur í markaðsferlinu.

Ok, svona hef ég almennt sett markaðsferlið fram:

Ef við nú setjum það fram línulega (frá vinstri til hægri eins og gengur og gerist ;) þá getum við sett Lead Management ferlið samhliða markaðsferlinu og markaðsaðgerðir sem við getum notað í hverjum hluta:

Förum betur í gegnum þetta:

Lead Generation er einfaldlega að ná til fólks. Láta vita af okkur og vekja áhuga þeirra. Þarna geta auglýsingar virkað ágætlega, en önnur sterk tól eru m.a. leitarvélabestun (SEO) og efnismarkaðssetning, þar sem að gott og áhugavert efni vekur athygli og eykur vitund um þig, fyrirtækið þitt, vörur og þjónustu. Þarna getum við þurft að “leigja”, þ.e. að kaupa auglýsingar til að ná þessari fyrstu snertingu við mögulega viðskiptavini.

Lead Capture er að ná þeim inn í markaðsferlið þitt. Ná þeim inn þannig að þau skrái sig á póstlistann (túrbó markaðstól), fylgi á samfélagsmiðlunum og hvað annað sem þér dettur í hug þannig að þú sért búin að ná þeim á þitt svæði, þar sem þú þarft ekki lengur að leigja frá öðrum til að ná til þeirra. Það má deila um hvort samfélagsmiðlarnir eru slíkt svæði, en það lækkar a.m.k. leiguna verulega ef maður nær fólki inn á samfélagsmiðlana því það er almennt ódýrara að auglýsa á fylgjendur sína en þá sem maður ætlar að ná til nýrra á samfélagsmiðlunum.

Lead Nurturing snýst allt um að rækta og byggja upp sambandið. Notaðu markaðsaðgerðirnar sem þú átt, eins og póstlistann, til að gera þetta og þarna kemur efnismarkaðssetningin sterk inn, bæði til að fá fólk til að líka við þig og til að byggja upp traust. Þetta tekur tíma. Fólk er ekkert tilbúið að kaupa af þér strax.

Spáðu aðeins í þetta. Þú getur verið mjög góður í fyrstu tveimur hlutunum, að ná til fólks og fá það inn til þín, en ef það er ekki þess virði að vera memm þegar inn er komið þá er fólk fljótt að fara aftur. Þess vegna skiptir það öllu máli hvað þú gerir í því að rækta sambandið – efnismarkaðssetning er lykilatriði þarna. Annars er þetta svona svolítið eins og liðið sem hangir á skemmtistaðagötunum á sólarströndum og nær þér inn inn á staðinn með gylliboðum – svo þegar þú kemur inn er staðurinn tómur!

Lead Conversion snýst um að gera þessa aðila að viðskiptavinum. Hingað til höfum við bara verið að rækta sambandið, leyfa þeim að kynnast okkur, kynnast þeim betur og þarna þarf tól til að breyta þeim í viðskiptavini með því að fá þá til að kaupa. Þarna þarftu að gefa þeim tækifæri til að prufa vöruna þína eða þjónustu og minnka áhættuna sem fólk upplifir – fólk upplifir alltaf áhættu þegar það kaupir. Það þarf líka að ýta við fólki með einhverjum hætti til að taka skrefið núna, ekki á morgun eða næsta ári.

Ongoing Lead Management snýst um að halda sambandinu áfram, í gegnum þessa miðla sem þú átt, og stuðla þar með að því að fólk skipti við þig aftur og að það vísi til þín frekari viðskiptum. Þarna gildir margt það sama og um lead nurturing en einnig meira til, s.s. eins og að vera með efni og upplýsingar fyrir þá sem hafa keypt af þér nú þegar, og vera með markaðsaðgerðir sem hvetja til tilvísana.

Farðu yfir það sem þú ert að gera í markaðsstarfinu þínu. Ertu að ná að leiða fólk í gegnum þetta ferli?

Að leigja eða eiga markaðsstarfið

Þeir sem hafa fylgst með mér í einhvern tíma gætu sakað mig um að vera á móti auglýsingum, svo mig langar aðeins að fjalla um þær í dag.

Ég er alls ekkert á móti auglýsingum, per se. Ég hinsvegar vil, í öllum tilfellum, nota þær markaðsaðgerðir sem henta best viðkomandi aðila, markaði og brandi, og sem skila sem allra mestri arðsemi (mmmm skemmtilega bissnesslegt orð! :) – og sem hægt er að sýna fram á að skili þeirri arðsemi og árangri.

Því miður erum við allt allt of oft að nota auglýsingar bara út í loftið og ekki að hugsa nógu vel út í hvað við viljum að þær geri og mæla hvort þær gera það. Staðreyndin er sú að fólk þarf að sjá mann (fyrirtækið, vöruna, þjónustuna) ansi oft áður en það er tilbúið að kaupa, og fyrir flest minni fyrirtæki er það einfaldlega of dýr kostur að gera það allt í gegnum auglýsingar. Ég hef talað töluvert mikið um hversu oft fólk þarf að sjá mann m.a. í þessu vídeó um markaðsferlið og þessu um endurtekningu og þessu um hversu oft! :) Ef maður ætlar að keyra markaðsstarfið mikið til á auglýsingum, þá þarf maður að auglýsa oft og mikið og það getur orðið ansi dýrt.

Annað sem óvant fólk hefur tilhneigingu til að gera í auglýsingum er að reyna að segja milljón hluti í einu. Staðreyndin er sú að það er nógu erfitt að fá fólk til að taka eftir og meðtaka ein skilaboð í auglýsingu – og um leið og þú reynir að gera meira þá sullast allt saman hjá fólki og auglýsingin missir algjörlega marks.

Hinsvegar geta auglýsingar verið frábær kostur ef notaðar rétt. Hvað þarf til að nota þær rétt? Hér eru 5 atriði sem skipta máli þegar þú notar auglýsingar:

Hvar er markhópurinn þinn og hvar er best að ná til hans? Það er almennt mun sterkara að auglýsa í sérhæfðari miðlum og ná til færri en rétta fólksins heldur en að spreða t.d. í heilsíðu í blöðunum eða auglýsingar í kringum fréttir í útvarpi eða sjónvarpi.
Hvaða skilaboð virka best á markhópinn þinn? Hvað er það sem hann er að leita eftir? Hvað er það sem þú getur gert fyrir hann? Hvað er það sem skiptir hann máli? Þetta veistu ekki nema með öflugri markhópagreiningu.
Notaðu frekar minni auglýsingar og oftar. Ein og ein stór auglýsing gerir ósköp lítið en minni auglýsingar, sem eru alltaf í gangi byggja upp sýnileikann og minna á þig, byggja meira upp.
Hvað viltu að auglýsingin geri? Hver er tilgangurinn með henni? EITT atriði – ekki meira! Hvað viltu að sá sem sér hana og tekur eftir henni geri næst? Jú, stundum auglýsum við bara til að láta vita af okkur, minna á okkur og vera sýnileg, en það er eiginlega bara allt of dýrt fyrir minni fyrirtæki að nota auglýsingar í þeim tilgangi. Ekkert mál t.d. fyrir banka og risa verslunarkeðjur sem eru með fjármagn í þessar leiðir, en fyrir flest fyrirtæki er þetta barasta of dýr leið. Það er betra að nota auglýsinguna til að fá fólk til að taka næsta skref í áttina að viðskiptum. Hvaða skref er það?
Hvernig ætlarðu að mæla hvort að auglýsingin er að gera það sem þú vilt að hún geri? Ef þú ætlar að mæla sýnileika og vitund þá ertu kominn í kannanir og annað þess háttar og það þarf sæmilegt úrtak til að það sé marktæk mæling – semsagt frekar dýrt og mikið vesen. Auglýsingar á netinu eru jú mun mælanlegri, sérstaklega ef auglýsingin er gerð til að fólk smelli á hana því þá geturðu mælt smellina. En hvað svo? Hvað svo eftir smellinn?

Staðreyndin er sú að ef þú treystir bara á auglýsingar í markaðsstarfinu þínu þá ertu að leigja markaðsstarfið. Ef einu skiptin sem fólk sér þig er þegar þú auglýsir, þá hættir það að sjá þig um leið og þú hættir að borga og þar með auglýsa. Búið. Bless. Ekkert meir. Búið að henda þér út.

Þess vegna hvet ég alltaf viðskiptavini mína til að eiga markaðsstarfið sitt. Jú, getur virkað vel að nota auglýsingar til að byrja ferlið, en svo viltu fá áhugasama inn til þín þannig að þú getir haldið sambandinu áfram án þess að þurfa alltaf að borga leigu. Hvernig, jú, t.d. með því að fá þau með þér á samfélagsmiðlunum þar sem þú getur haldið sambandinu áfram – eða enn betra – á póstlistann. Þar ertu kominn með viðkomandi inn í eitthvað sem er þitt og þú þarft ekki að borga í hvert skipti sem þú vilt eiga samskipti við viðkomandi. Þannig geturðu átt markaðsstarfið í stað þess að leigja það með auglýsingum.

Næst ætla ég að gefa þér dæmi um hvernig þú getur gert þetta ;)

Hint – já, það er efnismarkaðssetning í því – ég veit ég er alltaf að tala um hana, en það er góóóóð ástæða fyrir því ;)

Því miður, ég get ekki hjálpað þér…

Í nóvember og desember fæ ég oft símtöl eða tölvupósta frá fólki í kvíðakasti, biðjandi mig um aðstoð við að selja vöruna þeirra eða þjónustu fyrir jólin. Svona ca. kerter í jól :) Svo ég ætla núna að skrifa bloggpóst til að fræða þig, og sem ég get hreinlega sent hlekk í næst þegar ég fæ svoleiðis beiðni :)

Svarið er einfalt: “Því miður, ég get ekki hjálpað þér”. Það er ekki til nein töfralausn í markaðssetningu sem virkar á örfáum dögum eða vikum. Ef þú hefur ekki sinnt markaðsstarfinu þínu almennilega hingað til, byggt það upp og lagt inn í bankann, þá þýðir ekki að ætla að rjúka til núna og ætlast til að markaðsstarfið skili árangri á nokkrum vikum fyrir jól. Að ekki sé nú talað um að ætla markaðsstarfinu að ná athygli á þessum árstíma þegar allir eru að garga á alla um að kaupa þetta og kaupa hitt – maður einfaldlega drukknar í hávaðanum.

Það er núna sem þeir uppskera sem sáðu fyrir löngu síðan og rækta stöðugt markaðsgarðinn sinn. Þeir sem hafa byggt upp sambandið við markhópinn sinn. Þeir sem hafa leitt fólk í gegnum markaðsferlið nú þegar, eru búnir að byggja upp vitund, eru búnir að byggja upp áhuga, hafa fengið fólk til að líka við sig. Hafa byggt upp traust og hafa gert fólki kleift að prufa vöruna sína eða þjónustuna á einhvern hátt svo að fólki finnist það vita hvað það er að fara að kaupa. (Ef þú hefur ekki enn séð vídeóið mitt um markaðsferlið, smelltu hér til að kíkja á það ;)

Ég gekk inn í Hagkaup um daginn og við mér blasti standur með Vísindabók Villa. Um leið og ég sá hana þá vissi ég að ég myndi kaupa a.m.k. eitt, ef ekki fleiri eintök, til að gefa í jólagjafir. Hvað bókina varðar, þá rauk ég í gegnum markaðsferlið á innan við mínútu. Ég sá hana og vissi því af henni, hún vakti strax áhuga, mér líkaði við hana og treysti því að hún væri þess virði að kaupa. Ég kíkti á hana, sem kom mér yfir prufuferlið, et voilà, ég var tilbúin að kaupa. Eða hvað….?

Sannleikurinn var sá að ég hef verið að fylgjast með Villa í mörg ár. Börnin mín hafa setið stjörf yfir öllum bíómyndunum hans með Sveppa, og þegar þeir hafa birst saman í sjónvarpinu um helgar í gegnum tíðina. Ég hef hlustað á spurningaþáttinn hans í útvarpinu á sunnudögum og fór með dóttur mína á Karíus og Baktus með Naglbítunum fyrir mörgum árum síðan. Ég hef vitað af Villa í mörg mörg ár, haft áhuga á því sem hann hefur verið að bralla og líkað við hann. Ég hef séð aðra hluti sem hann hefur gert, og treysti honum þess vegna til að gera góða hluti og það var auðvelt að prufa bókina – ég bara blaðaði í sýningareintakinu. Villi hefur lagt inn hjá mér í mjög langan tíma og þess vegna er hann að uppskera núna með sölu á bókinni sinni.

Ef þú ert ekki þegar farinn að rækta markaðsstarfið þitt, þá er of seint í rassinn gripið að ætla að gera það núna til að fá sölu fyrir jólin. Þú getur hinsvegar tekið þá ákvörðun að ætla að taka þetta föstum tökum og tryggja að þú sért ekki í sömu sporum næstu jól. Það er t.d. tilvalið að skella sér núna á MáM þjálfunina í markaðsmálum til að tryggja að næstu jól verði sérstaklega gleðileg! Ef þú tryggir þér áskrift fyrir jól færðu einn mánuð í bónus, auk þess sem þetta er síðasti sjéns til að fá þjálfunina með sérsniðinni skýrslu frá mér með tillögum að markaðsaðgerðum og sem kemur markaðskerfinu þínu af stað (þjálfunin breytist aðeins eftir áramótin ;)

Smelltu hér til að fá að vita meira um MáM þjálfunina!